ვრცლად: ძალაუფლების როლი სამოქალაქო წინააღმდეგობაში.
ძალაუფლების წყაროები შეიძლება გაუგებრად ჟღერდეს, და სხვანაირად რომ ვთქვათ, დაახლოებით იგივეა, რაც ბერკეტები (levers/leverage), ოღონდ სამოქალაქო წინააღმდეგობის შემთხვევაში იგულისხმება რეჟიმის ბერკეტები ხალხის წინააღმდეგ.
შემდეგი მაგალითი მოყვანილია საყრდენი ბურჯების სტატიიდან, პოლიციის მაგალითზე, საიდან მოდის პოლიციის ძალაუფლება მოქალაქეების მიმართ.
პოლიციაში შემდეგი ძალაუფლების წყაროები ერთიანდება:
1. ავტორიტეტი — პოლიციას აქვს ავტორიტეტი, რომ კანონი გაატაროს.
2. ადამიანური რესურსები — პოლიციაში ათასობით ადამიანი მუშაობს.
3. უნარები და ცოდნა — პოლიცია რეჟიმს სხვადასხვა უნარებით და ცოდნით ეხმარება, მაგალითად: გამოძიების მეთოდები, კომპიუტერის და ტექნოლოგიური ცოდნა, თვალთვალის მეთოდები, დემონსტრაციის დაშლის ცოდნა და ა.შ.
4. მატერიალური რესურსები — პოლიციას აქვს იარაღი, კომპიუტერები, მანქანები, შენობები, რაციები, და ზოგჯერ შვეულმფრენების, თვითმფრინავების და კატერების ბიუჯეტიც აქვთ.
5. ხელშეუხებელი ფაქტორები — ხალხი ბავშვობიდან მიჩვეულია, პოლიციას დაემორჩილოს. მაშინაც კი, როცა პოლიცია და არმია ადგილზე არაა, ხალხი მათი ავტორიტეტის სიმბოლოებს მაინც ემორჩილება.
6. სანქციები — თუ პოლიციას არ დაემორჩილები, დაისჯები. თუ მათ ბრძანებას შეეწინააღმდეგები, მაგალითად, თუ გაიქცევი, როცა შეჩერებას ითხოვენ, სასჯელი შეიძლება გაცილებით უარესი იყოს.
ეს მაგალითი რომ ავხსნათ:
- ავტორიტეტი იმას ნიშნავს, რომ ქუჩაში პოლიცია როცა გაკავებს, ხალხს მიაჩნია რომ პოლიციას აქვს ამისი ავტორიტეტი (კანონით მინიჭებული უფლება) და ამიტომ არ ერევიან, ხელს არ უშლიან დაკავებაში.
- ადამიანური რესურსები — პოლიციელი რომ ერთი იყოს, ხალხი იფიქრებდა, რომ არ გაატანენ შენს თავს, მაგრამ იციან, რომ ბევრნი არიან და ამათ დასახმარებლად სხვა, ათობით და ბოლოს ასობით პოლიციელი მოვა, სანამ არ შეძლებენ შენს დაკავებას.
- უნარები და ცოდნა — პოლიციას რომც გაექცე, გამოიძიებს, ნახავს კომპიუტერში შენს მისამართს, თითის ანაბეჭდს, კამერებს ამოიღებს, საით გაიქეცი, და ბოლოს შეიძლება მანქანით ან შვეულმფრენითაც დაგეწიოს.
- მატერიალური რესურსები — რო სცადო სროლით თავდაცვა, პოლიციასაც აქვს იარაღი და უფრო მეტს გესვრის. რომ გაიქცე და სადმე ციხესიმაგრეში ჩაიკეტო, მოვა პოლიცია ბევრი მანქანით, ალყას შემოგარტყამს და გაიძულებს, დანებდე.
- ხელშეუხებელი ფაქტორები — ხალხს რომც შეეძლოს დაკავებისას დაგეხმაროს, იმდენად მიჩვეულია პოლიციისთვის დამორჩილებას, რომ შეიძლება უბრალოდ თავში არ მოუვიდეს აზრად დახმარება.
- სანქციები — პოლიციას შეუძლია (კანონით აქვს უფლება), თუ რამე არ მოეწონება (წესით, თუ კანონს არღვევ), სანქცია დაგიწესოს და დაგაკავოს. თუ გაიქცევი, შეუძლია უარესი სანქცია დაგიწესოს (უარესად დაგსაჯოს — “წინააღმდეგობის გაწევა” ცალკე დანაშაულია).