საქართველოს და ერის სამსახურში მდგომო სამხედროებო,
თქვენ ყველაზე კარგად იცით, რას წარმოადგენს რუსეთი და რომ ეს არ არის საქართველოს მომავალი. წლების მანძილზე, ქვეყნის გარედან გვიცავდით რუსეთისაგან, მაგრამ ახლა, შიგნიდან წამოსული რუსი მტრისგან და კონსტიტუციური გადატრიალებისგან თავდაცვაშიც გვჭირდება თქვენი დახმარება!
ყველას გვესმის, რომ თქვენ გაქვთ თქვენი მოვალეობები, უფლებები და შეზღუდვები და გვესმის ისიც, რომ პრეზიდენტის ბრძანებამდე ვერ დაგვიცავთ სამსახურეობრივი მოვალეობის შესრულების დროს.
მაგრამ ეს არც არის საჭირო — თქვენ ფიზიკურად და მენტალურად ყველაზე ძლიერი ქართველები ხართ! ჩვენ, საქართველოს ამაყ და მებრძოლ მოქალაქეებს გვჭირდება თქვენი დახმარება! მოდით ჩვენთან, როგორც საქართველოს რიგითი მოქალაქეები, მუნდირის და იარაღის გარეშე, წინა რიგებში, სადაც არაადამიანური, არაკანონიერი და რუსული სტილის მეთოდებით, წიწაკით და ხელჯოხით უსწორდებიან 20 წლის გოგო-ბიჭებს, გთხოვთ დაგვიცავით თქვენი სხეულებით, იყავით ცოცხალი ფარი ჩვენსა და მოძალადე სისტემას შორის. იმედი გვაქვს, თქვენს დანახვაზე მილიცია უკან დაიხევს და ვეღარ შეძლებს ძალადობას, ხოლო ღირსების მქონე ქართველ პოლიციელებს მიეცემათ საშუალება, ამოიღონ ხმა, დადგნენ საკუთარი სამშობლოს მხარეს და საკადრისი პასუხი გასცენ მილიციონრებს!
მოდით ფორმით და არა აღჭურვილობით ან სანომრე სპეციალური ნიშნებით, რათა ამ ჯალათებმა დაინახონ, რომ ერს ძლიერი ჯარი უმაგრებს ზურგს! მე მჯერა, რომ თქვენთან შეჭიდებას ვერც კი გაბედავენ…
2012 წლიდან “ქართულმა ოცნებამ” თავდაცვის სტრუქტურის განადგურება და დაღმასვლა დაიწყო; მოდით იმისთვის, რომ ჯარისკაცის სახელი და პრესტიჟი კიდევ ერთხელ აღორძინებული იქნას ჩვენს ქვეყანაში, ეს არაა პარტიების ბრძოლა, ეს არის ქართველი ერის ბრძოლა თავისუფლებისთვის!
შევხვდებით რუსთაველზე! გთხოვთ, არ დაგავიწყდეთ – გაგვეცანით ადგილზე, დაემატეთ ჯგუფებში, ვინც ჯერ არ გიცნობთ, გაგიცნობთ და დავმეგობრდებით.
ყურადღება!
საქართველოს უნივერსიტეტმა შექმნა ფონდი, რომელიც საჯარო მოხელეებს, ვისაც ევროინტეგრაციის მხარდაჭერის გამო მოუწევს სამსახურიდან წამოსვლა, 1 წლის განმავლობაში გადაუხდის ხელფასს.